炒幣炒到凍飲加兩蚊
有關加密貨幣嘅技術分析同市場分析大家就聽得多，今次反而想講下啲無聊嘢。話說自從舊年年底Crypto穾然爆升，身邊都識得有人因為呢轉升浪而賺5倍、甚至10倍以上嘅利潤，響呢段短短時間成為千萬、甚至億萬富翁。
有趣嘅係，同當年股市大升聽倒好多人「魚翅撈飯」、買車買樓唔同，呢班「新世代暴發戶」大多數都無乜改變到自己嘅生活模式：一個身穿頹T牛仔褲，出街搭車仍然依賴30歲後出色嘅男性唔應該再坐嘅公共交通工具，仲要連的士Uber都唔捨得搭，隨時個電子Wallet入面記錄住佢嘅千萬身家。結果每逢幣市大升，「食茶記終於可以加兩蚊轉凍飲」、「今次仲可以轉埋一丁麵」添，就成為炒幣友圍內In-joke。
要解釋「新世代暴發戶」缺乏消費欲望，唔追求同自己身份相稱嘅生活條件當然可以有好多解釋，例如認為後市有排升，做好DEFI嘅唔想分散資金削減自己嘅Yield；財富黎得太快感覺好唔實在，需要時間好好整理自己情緒；自己生活大部份時間都係花響虛擬世界，無需要響現實世界再去證明自己幾有錢等等。
但我覺得最重要一點卻係，好多響大升市前經已有投資加密貨幣嘅人當中，唔少都係因為認同區塊鏈技術去中心化金融嘅理念：簡單黎講，就係同認為Bitcoin係龐氏騙局嘅人完全相反，佢地真心相信Crypto能夠超越各國政府中央銀行嘅制肘，成為被國際認可嘅資產──既然持有Crypto就係參與一場貨幣革命，物質生活就相對無咁重要；而就算要炫富又或者提升生活品質，都寧願選擇響網上進行。
所以最近NFT被瘋炒，除咗係本身有投資價值外，其實就好似有人發咗達開始會買美術品收藏一樣，只不過傳統美術品你會擺響收藏室作私人欣賞，而NFT你卻係擺響電子Wallet入面而已，兩者響作為Decoration嘅作用上面，本質並無分別。
記住用下面條LINK申請KIKITRADE ACCOUNT