MATIC與SOL爭霸側鏈市場：作為用家的體驗分享
Updated: Jul 18, 2022
上文講過因為ETH手續費長期高據不下，所以公鏈／側鏈／Layer 2有關嘅概念幣必然順勢炒起，今次特別講下兩隻我嘅愛幣：Matic同SOL
成日聽「以太坊殺手」，其實首要講嘅應該係幣安幣BNB；當日玩去中心化金融由以太坊跳去幣安鏈，係充份感受到佢嘅迅速同埋便宜；再加上佢嘅規模同廣泛性應用，係值得由大半年前幾蚊美金升去今日五百蚊美金嘅高位。
之但係隨住愈來愈多人用，幣安鏈都試過唔止一次出現塞車問題（雖然時間比起以太坊算短），同埋仍然有唔少人擔心幣安鏈只有21個超級節點呢個中心問題（簡單黎講，就係擔心少數人可以影響整幣安鏈生態發展），再加上手續費雖然只係以太坊零頭，但隨住BNB價錢水漲船高，手續費亦響不知不覺間標升到幾蚊美金一次，於是其他區塊鏈方案仍然有相當大嘅市場需求。
特別提SOL同MATIC，係因為呢兩條側鏈／Layer 2，我都有親身用過，完全明白佢地嘅威力所在：比起幣安鏈，SOL同Matic響手續費上面都更低、塞車機會更少（當然同應用數量比以太坊同幣安鏈都少好多嘅原因），經已衍生出Defi同NFT兩大熱門應用……完全係有當日幣安鏈爆升嘅影子響入面。
SOL屢破歷史新高，帶挈埋響同一鏈下相關應用幣如SRM、RAY、FIDA、STEP全部都以幾倍爆升（只有隻Oxy唔爭氣，嗚嗚），但老實講佢作為新發行嘅側鏈幣，唔少應用都未係咁成熟，例如以前佢嘅設定係每隻幣都有獨立地址，只要你一轉錯地址隨時可以渣都無得剩，本人就曾經經歷過幾乎無咗萬幾蚊美金嘅經驗，幾經辛苦搵咗半日網上資訊再試咗半日先Recover番。
其實SOL問題都唔單止呢樣。好似開唔同嘅應用程式，有時需要唔同嘅錢包插件（例如競投某款NFT就指定要用Phantom錢包，Sollet錢包就係做唔倒）；同一個Seed Phrase響唔同錢包插件可以開出唔同錢包造成混亂（到而家我都未搞清楚點解）……總之比我感覺嘅體驗就係SOL仲係好唔成熟，有待改進。
相比起黎Matic由於算係Layer 2同側鏈之間，本身唔需要好似SOL有新地址，用Metamask已可以無縫接合；要從以太坊轉移資產至Polygon（Matic別名）Chain係非常方便，NFT交投甚至可以同以太坊並存響同一個Opensea A/C而唔似SOL有獨立嘅Market Place，其他DEFI Project亦用得相當順手，Bug明顯比SOL少得多，至於速度同手續費便宜程度以一般人感覺而言其實比起SOL唔會有太大分別。
然而尷尬嘅係，Matic Defi屢屢爆鑊，比人響安全上存在若干陰影；而家兩隻比靠出名嘅Matic概念幣DFYN同QUICK表現亦比Ray同SRM差（雖然Quick一個月來都叫升咗一倍……），可能係同佢地嘅Tokenomics設計有關。
總括黎講，Matic響前半年表現十分標清，但去到年中以後卻出現大漲小回情況，結果比SOL後來居上甚至超越；而我嘅睇法就係Matic既然用戶體驗同SOL差不多甚至更好，佢嘅價值尚未完全反映響幣價上面；以執筆時現價1.28黎講，目標3美金我覺得係一個合理數字……
記住用下面條LINK申請KIKITRADE ACCOUNT:
想知道更多無神論者的巴別塔有關加密貨幣分析，請加入：https://www.patreon.com/user?u=7173543